Бугунги кунда жамиятда тинчлик ва барқарорликни таъминлаш нақадар муҳим эканлиги барчамизга маълум. Инсон ҳар жиҳатдан хотиржамликка эришсагина, ҳаётда кўп натижаларга эришади. Аммо жамиятда турли фирқаланиш, фитна – фасод, ўзаро зулмкорлик, адоват, ҳиқду ҳасад қузийдиган бўлса, бу жамиятда ривожланиш бўлмайди. Аллоҳ таоло бандаларига ҳаётда нимага амал қилса, бахтли, саодатли яшашини тартибини белгилаб берган. Инсон Аллоҳ белгилаб берган низомдан четга чиқса, бошига қанчалар мусибат ва балолар келиши тарихдан ибрат ўлароқ барчамизга маълум.

Аллоҳ таоло Қуръони каримда марҳамат қилади: “Эй, имон келтирганлар! Аллоҳга ҳақиқий тақво ила тақво қилинг. Ва фақат мусулмон ҳолингиздагина дунёдан ўтинг. Барчангиз Аллоҳнинг «арқони»ни маҳкам тутинг ва бўлиниб кетманг. Аллоҳнинг сизга берган неъматини эсланг: бир вақтлар душман эдингиз, бас, қалбларингизни улфат қилди. Унинг неъмати ила биродар бўлдингиз. Оловли жар ёқасида эдингиз, ундан сизни қутқарди. Шундай қилиб, Аллоҳ сизга Ўз оятларини баён қилади Шоядки, ҳидоят топсангиз”. (Оли-Имрон сураси 102-103)

Абдуллоҳ ибн Масъуд розияллоҳу анҳу ҳақиқий тақвони: “Аллоҳга итоат этиб, исён этмаслик, уни эслаш ва унутмаслик, унга доимо шукр қилиб, куфр келтирмаслик”, деб таърифлаганлар.

Аллоҳ таоло мана шу оятда барча ишларимизни Ўзи буюрганидек қилишимизни, қайтарганларидан қайтишимизни амр этиб, ҳаётимизни Ўзининг каломи Қуръонга мувофиқ яшашимиз буюрмоқда. Ўзаро қирпичоқ бўлмаслигимизни, аҳл бўлишимизни буюрмоқда. Аллоҳнинг неъмати ила мусулмон бўлганимизни унутмаслигимиз эслатмоқда. Агар Аллоҳ таоло ҳолимизни ўнгламаса, не не мусибатларга мубтало бўлишимизни уқтирмоқда.

Юқорида келтирилган оятдан маълум бўладики, инсонлар икки дунёда саодатда яшаши учун ўзаро аҳиллик ва бирдамликда ҳаёт кечириши, фитналардан сақланмоғи, бир – бирини кечишриши, дўсту – биродар бўлиши зарур.

Аллоҳ таоло тинчлигимизни барқарор қилсин. Ўзаро ҳамжиҳатликда ҳаёт кечириб, охиратда саодатли бўлмоқликни барчамизга насиб этсин. Фитналар ва фирқаланишдан Ўзи сақласин.

Равшанов Сарвар Нарпай туман "Тепа" жоме масжиди имом-хатиби