Ishq sirini bayon etgan Navoiydan oldim saboq,

She’r mag‘zini chaqolmasdan, goh tushimda qildim so‘roq.

Navoiyda mastur emish hayo, iffat, odob-axloq,

Bilmoq bo‘lsang nafsni tiygin, Xaq so‘ziga solgin quloq.

Qur’on, hadis ma’nosiga hamohangdir g‘azallari,

Ham nasihat, ham ma’rifat, ham ohangdir g‘azallari.

Dilimizda hirsu havas ham qabohat uya qurmish,

Nafs domig‘a bandi bo‘lgan, haqiqatdan chetda yurmish.

Chunki u zot ishq darsini oyatlardan olgan ekan,

Shu sababli yozgan she’ri to bizgacha kelgan ekan.

Adovatning, razolatning, tag-tomirin qo‘porgandir,

Hazrat bitgan she’rlarini ishq suvidin sug‘organdir.

Haqiqatni bila turib nechuk unga qo‘shilmaymiz?

Navoiyning she’rlarini u kutgandek tushunmaymiz?!