O‘zbekiston musulmonlari idorasi
Samarqand viloyati vakilligi
w w w . s a m m u s l i m . u z

Xabarlar

OLIS TUMANLARDA BAYRAM SHUKUHI

 
 

O‘zbekiston musulmonlari idorasi Samarqand viloyati vakilligi tomonidan Umumxalq bayrami 9-may – Xotira va Qadrlash kunini munosib kutib olish va nishonlash maqsadida qator ishlar amalga oshirilmoqda. Jumladan viloyatning chekka tumanlari va chegaraoldi hududlarida joylashgan masjidlarga juma namozini ado etish va o‘sha atrofdagi mahallalarda istiqomat qiluvchi ikkinchi jahon urushi qatnashchilari, mehnat faxriylari, nogironlar, yolg‘iz keksalar, kam ta’minlangan oilalar holidan xabar olish maqsadida malakali imomlar safarbar etildi.

6 may juma kuni viloyatning chegaraoldi hududlaridan Bulung‘ur tumanidagi “Olomon” jome masjidiga “Xo‘ja Is’hoqi Vali” jome masjidi imom xatibi Ixtiyor Orziqulov, chekka hududlardan Narpay tumanidagi “Besh Qozoq” jome masjidiga Samarqand shahar bosh imom xatibi Umid Rustamov, Kattaqo‘rg‘on tumanidagi “Abdurahmon ota” jome masjidiga “Xo‘ja Abdu Mo‘min” jome masjidi imom xatibi Jahongir Hotamov, Paxtachi tumanidagi “Toshko‘prik” jome masjidiga “Xo‘ja Ahrori Vali” jome masjidi imom xatibi Bahodir Sharipovlar tashrif buyurdilar.

Voizlar juma namozida tezis asosida ma’ruza qilar ekanlar, yurt tinchligini avaylab-asrash, doimo hushyor turish, ayniqsa chegara hududlarda hushyorlikni yanada oshirish borasida fikr-mulohazalar bildirib o‘tdilar. Bayram munosabati bilan masjidlar, qabristonlarni obod etish, qo‘ni-qo‘shnilar, qarindoshlar holidan xabar olish fazilati haqida ham batafsil to‘xtaldilar.

Namoz ado etilgach, imom domlalarimiz masjid atrofida istiqomat qiluvchi keksa otaxonlar, mehnat faxriylari holidan xabar olib, ularga bayram sovg‘alari ulashdilar.

O‘zbekiston musulmonlari idorasi

Samarqand viloyat vakiligi


Kiritilgan vaqti: 07/05/2016 00:00;   Ko‘rilganligi: 3151
 
Material manzili: https://www.sammuslim.uz/oz/press/news/olis-tumanlarda-bayram-shukuhi
Chop etilgan vaqti: 29/03/2024 15:58
 
 
O‘qish uchun ushbu tugmani bosing