Savobi ulkan amal!
Sahobalar Rasululloh sollallohu alayhi va sallamning sunnatlari keng yoyilishida beqiyos xizmat qilishgan. Bu bejizmas. Chunki Payg‘ambarimiz alayhissalom bunday deganlar: “Mening gapimni eshitib, yodlab, singdirib, so‘ngra qanday eshitgan bo‘lsa, ana shunday yetkazgan odamni Alloh ne'matlantirsin” (Imom Termiziy rivoyati).
Tahoratdan so‘ng duo qilishning fazilatiga to‘xtalsak. Umar ibn Xattob roziyallohu anhudan rivoyat qilinadi. Rasululloh sollallohu alayhi va sallam: «Kim yaxshilab tahorat olsa, so‘ngra: “Ashhadu allaa ilaha illallohu vahdahu laa shariykalahu va ashhadu anna Muhammadan abduhu va Rasuluhu”, desa, uning uchun jannatning sakkizta eshigi ochiladi va xohlaganidan kiradi», dedilar (Imom Muslim rivoyati).
Imom Termiziy Umar ibn Xattob roziyallohu anhudan rivoyat qilgan hadisda Rasululloh sollallohu alayhi va sallam: «Kim yaxshilab tahorat olsa, so‘ngra: “Ashhadu allaa ilaha illallohu vahdahu laa shariykalahu va ashhadu anna Muhammadan abduhu va Rasuluhu. Allohummaj'alniy minat-tavvabiyn vaj'alniy minal mutatohhiriyn” desa, uning uchun jannatning sakkizta eshigi ochiladi va xohlaganidan kiradi», dedilar.
Rasululloh sollallohu alayhi va sallamning sunnatlariga muvofiq har bir mo‘min tahoratdan so‘ng yuqoridagi muborak kalimalarni aytishga odatlanishi maqsadga muvofiqdir. E'tibor qaratadigan bo‘lsak, tahorat juda oson, savoblari ulkan, gunohlarni ketkazuvchi, Allohga yaqinlashtiruvchi hamda jannatga yetaklovchi amaldir. Ammo e'tiborsizlik, dangasalik va beparvolik sabab bunga amal qilmaymiz.
Alloh taolo barchamizni har bir ishda Rasululloh sollallohu alayhi va sallamning sunnatlarini o‘rganib, unga amal qilib yashashni nasib aylasin!
Obidjon ISMOILOV,
Sariosiyo tumani
“Imom Nizomiddin Sangardakiy”
jome masjidi imom-xatibi
Kiritilgan vaqti: 21/02/2024 14:45; Ko‘rilganligi: 155
Chop etilgan vaqti: 29/04/2024 20:40