Jamiyatda sog‘lom ma'naviy muhitni mustahkamlash, notinch oilalarda barqarorlikka erishish, yoshlarni to‘g‘ri yo‘lga boshlashda joylardagi imom xatiblarning alohida o‘rni bor. Bu borada ular diniy bilimlar bilan birga yon-atrofda sodir bo‘layotgan voqea-hodisalar, yurtimizda barcha sohalarda amalga oshirilayotgan islohotlar, qonunchilikdagi yangilik va o‘zgarishlardan xabardor bo‘lishi maqsadga muvofiq.

Imom-xatiblarimiz buyuk muhaddis maqbarasini ziyorat qilib, xalqaro markaz va hadis ilm maktabida yaratilgan sharoitlar bilan tanishdi, ilmiy-tadqiqot ishlari haqida ma'lumotlarga ega bo‘ldi. 

 Imom Buxoriy xalqaro ilmiy-tadqiqot markazi direktori Shovosil Ziyodov mehmonlarga markazning tashkil etilishi, maqsad va vazifalari, xalqaro hamkorlik va ilmiy-tadqiqot yo‘nalishida olib borilayotgan ishlar haqida gapirib berdi. Shuningdek, ayni paytda xalqimizning diniy va dunyoviy bilimlarini boyitish, jamiyatda uchraydigan turli illatlarga qarshi kurashishda imom-xatiblar oldida turgan vazifalarga to‘xtaldi. 

O‘quv-seminarda markaz ilmiy xodimlari tomonidan Imom Abu Mansur Moturidiy, Imom Buxoriy va boshqa buyuk allomalarning ilmiy merosi, ularning kalom va hadis ilmi rivojiga qo‘shgan hissasi, bu ilmlarning bugungi kundagi ahamiyati haqida so‘z yuritildi.

O‘MI Samarqand viloyat vakilligi matbuot xizmati