Navbatdagi Samarqandlik ziyoratchilar jo‘nab ketishdi
Bismillahir Rohmanir Rohiym.
«Ibn Abbos roziyallohu anhumo:
«Albatta, u (umra) uning (hajning) Allohning Kitobidagi dugonasidir. «Alloh uchun haj va umrani tugal ado eting», dedi».
Darhaqiqat, Alloh taolo Qur'oni Karimda umrani hajga qo‘shib zikr qilgan. Bu umraning qanchalar ulug‘ ibodat ekanligiga yorqin dalil bo‘la oladi.
Alloh taolo haj va umrani tugal ado etishga buyurib:
«Alloh uchun haj va umrani tugal ado eting», degan.
Umra esa lug‘atda «ziyorat» va «obodlik» ma'nolarini bildiradi. Islom shariatida esa Baytullohni tavof qilib, Safo bilan Marva o‘rtasida sa'y qilib bajariladigan maxsus ziyoratga aytiladi.
Ushbu oyatda Alloh taolo haj va umraning farzlarini, shartlarini tugal, benuqson qilib, Alloh uchun ado etishga amr qilmoqda.
Shu bilan birga, unda haj yoki umrani niyat qilib, ibodatni boshlasangiz, oxiriga yetkazing, degan ma'no ham bor. Bu ilohiy amrga binoan, haj yoki umrani niyat qilib, ehromga kirgan har bir musulmon uni oxirigacha mukammal ado etishga urinadi.
Shu amallarni niyat qilgan holda 30 dekabr dushanba kuni Umra ibodatini ado etish uchun otlangan Samarqandlik 244 nafar ziyoratchilar Saudiya Arabistoniga jo‘nab ketishdi.
Safar oldidan Samarqand shahar bosh imom-xatibi Nuriddin domla Islomov tomonidan ziyoratchilarga Umraning mazmun-mohiyati, shartlari hamda ado qilish tartib va odoblari to‘g‘risida zarur ma'lumotlar berildi.
O‘MI Samarqand viloyati vakilligi matbuot xizmati
Kiritilgan vaqti: 30/12/2019 12:47; Ko‘rilganligi: 1116
Chop etilgan vaqti: 15/03/2025 15:22