Бугун тўй, марака, маросимларда 3-4 хил таом тортилиши керак, деган тушунчалар кўпчилигимизнинг қорин ғамига муккасидан кетганимиздан дарак. Аслида ортиқча овқат еган ёки ичимлик ичган одамнинг тана­си оғирлашади, тоат ибодатида ҳаловат йўқолади. Меҳнат қилишга малолланиб қолади.

Шу боис Расулуллоҳ (с.а.в): "Одамзод қориндан кўра ёмон бирор идишни тўлдирмаган. Одам боласига гавдасини тик тутишга бир-икки луқма озуқа етади. Агар кўпроқ егиси келса, унда ошқозонининг учдан бири овкатга, учдан бири ичимликка, учдан бири ҳавога тўлдирилиши керак" деганлар (Имом Термизий ривояти).

Бизда ота-боболаримиз оиласи эҳтиёжидан ортса, қўни-қўшниси, ёрдамга муҳтож кишилар би­лан баҳам кўришган. Машойихлар: "Яхшилик қанча кўп қилинса ҳам исроф бўлмайди. Аммо исрофнинг зарраси ҳам ҳаромдир", деб таъкидлаган. Дарҳақиқат, Аллоҳ розилиги йўлида қилинган ҳар қанча хайр-эҳсон исроф бўлмайди. Ва аксинча, ҳар қандай исроф, гарчи зоҳиран чиройли кўринса ҳам унда би­рор яхшилик йўқ. Шундай экан, Аллоҳ берган неъматларга шукр қилиш, уларни тежаб, исроф килмай ишлатиш банданинг вазифаси. Шундай экан, ҳар бир неъматга алоҳида эътибор билан ёндашиб, фарзандларимизга ҳам улардан оқилона фойдаланишни ўргатсак, гуноҳлардан сақланган бўламиз.

Б.ШАРИПОВ –  Самарқанд туман бош имом-хатиби